من متابعتي للي بيحصل الفترة الحالية فدي أشهر خمس طرق النصب الإلكترونية اللي بيتنصب علي الناس بيها اليومين دول وانتشرت بشكل كبير جدا.
الطريقة الأولي:
النصاب بيدخل علي جروب من جروبات الحيوانات الأليفة ويحط صورة قطة جميلة جدا ويقول انه مضطر يسافر ومعندوش حد يسيب القطة عنده وانها واخده كل التطعيمات الخ. طبعا ناس كتير بيبعتولو لان القط او الحيوان بيكون شكله جميل جدا فعلا والقصة كلها كام يوم يعني قشطة. طيب يباشا تمام في حد من شركة شحن هيتواصل معاك عشان يوصلك القطة علي عنوان بيتك. وطبعا مفيش شركة شحن ولا حاجة, ده هو نفسه النصاب وبيطلب منك 150 جنية مصاريف شحن القطة لعنوان بيتك وبمجرد ما تحوله يتعملك بلوك او ميردش عليك تاني.
الطريقة التانية:
توصلك رسالة انه اتفتحلك حساب مالي علي موقع كذا والمبلغ حوالي 2000 دولار او اكتر وده اليوزر نيم والباسورد بتوعك عشان تدير حسابك. طبعا ناس كتير بتقع في الفخ ده بما انها فلوس سهله وانا يعني خسران ايه؟ لكن الفكرة انه بمجرد تسجيل الدخول علي الموقع ومحاولتك لسحب الفلوس هيطلبو منك كذلك مصاريف تحويل عشان تقدر تسحب الفلوس, وزي منت توقعت كده هياخدوها ومش هتاخد منهم حاجه لان مفيش فلوس اصلا والحداية مبتحدفش كتاكيت.
الطريقة التالتة:
اعلانات لوظائف بمرتب شهري وهتقبض وانت قاعد في البيت. الوظايف بتختلف من نصاب للتاني, عندك مثلا Data Entry او مدخل بيانات, وهيقولك هتاخد مرتب 5000 جنيه وانت شغال من البيت كل القصة اننا هنبعتلك كتاب ورقي وانت هتكتبه علي الكمبيوتر في ملف Word وتبعتهولنا وهي دي وظيفتك, طيب تمام انا جاهز ابدأ اعمل ايه؟ نفس القصة خد ده رقم شركة الشحن حولهم مبلغ الشحن كذا عشان يوصلولك الكتاب وزي اللي فات هيضربو علي مبلغ الشحن ومفيش حاجه هتوصلك وهيتعملك بلوك.
الطريقة الرابعة:
هيوصلك اميل من هكر بيقولك انه اخترق جهازك واخد منه صورك الخاصة وكمان سجلك فيديوهات من كاميرة اللاب توب وعايزك تدفع 500 دولار والا هيفضحك علي الانترنت ويبعت كل الحاجات دي لقرايبك وصحابك, وكدليل علي صدق كلامه هيبعتلك باسورد انت بتستخدمه.
طبعا الكلام ده بلح, هو مخترقش جهازك ولا حاجه, ده كلام فاضي. امال ايه اللي حصل؟
ببساطة باسوردات الناس بتتسرب كل يوم من مواقع مسجلين فيها زي موقع الجامعه بتاعتك او زي الاختراقات اللي حصلت علي شركات زي LinkedIn و SWVL وغيرها من الشركات, فاللي هو بيعمله انه بيجيب باسورداتك من التسريبات دي ويبعتهالك في الاميل ويحاول ينقعك انه اخترق جهازك ولازم تدفعله فلوس. لكن زي ما شرحنا ده مجرد باسورد متسرب علي الانترنت فغير الباسورد وامورك تمام مفيش اختراق ولا ماسك عليك اي حاجه.
الطريقة الخامسة:
طريقة كليشيه جدا بس للأسف لسه شغاله, وهي انه النصاب بيسجل رقمه علي ترو كولر True Caller بإسم أي بنك ويحط كمان صورة البنك علشان لما يتصل بيك وانت منزل عندك تروكولر يظهر قدامك صورة واسم البنك فتتعتقد انه ده البنك فعلا. وبيطلب منك بيانات ال Credit Card (الفيزا) بتاعتك والرقم السري بتاعها وانت اكيد عارف اللي بيحصل بعد كده.
أحمي نفسي ازاي؟
- If it is too good, it is not true يعني ببساطة الحدايه مش بتحدف كتاكيت ومفيش اي منطق انه حد يجي يديلك فلوس من اللاشئ. النصاب بيلعب علي الطمع عند الناس, فخليك حريص.
- البنك عمره ما هيطلب منك اي بيانات شخصية او بيانات الكروت بتاعتك عشان ببساطة كل البيانات دي عنده بالفعل, ولو محتاجين تجديد اي حاجه هيقولك وانت في الفرع مش هيطلب منك البيانات من خلال التلفون, ابدا.
- لو في اي صفحة علي الفيس بوك هتشتري منها حاجه او حد نزل بوست عن قطط ولا غيره فدايما راجع الصفحة دي كويس ومتكتفيش بعدد اللايكات اللي عليها, شوف التفاعل والتعليقات علي بوستاتهم وشوف ال reviews اللي بتعملها الناس ولو تقدر كمان فاسأل حد اشتري منهم قبل كده.
- لو لا قدر الله وقعت ضحية لأي عملية نصب إلكتروني فالتصرف الصحيح هو بلاغ في مكافحة جرائم الانترنت. حتي لو اتأخرو علي حضرتك فهما الجهه الوحيدة والصحيحة للتصرف في أمر زي ده عشان هما فقط اللي يقدرو يتتبعو النصابين دول ويقبضو عليهم كمان.
أرفقت لحضراتكم صور جمعتها من الرسايل اللي بتوصلني وأتمني انه البوست يساعد حضراتكم في تفادي عمليات النصب, ويحفظ أهالينا الكبار في السن اللي معندهمش خبرة في التعامل مع مثل هذه الحالات.
هل حصل معاك طريقة مختلفة؟ شاركنا بيها في التعليقات
