أي منصة محتوى مرئي هدفها الأول والأخير هو انك انت كـ مستخدم تقضي اكبر وقت ممكن عليها، بكده يقدروا يعرضولك الاعلانات اللي المعلنين بيدفعوا فلوس عليها او يجمعوا عنك داتا تفيدهم بعدين وتكسبهم فلوس سواء ببيع الداتا دي او بفهم pattern استخدامك اكتر.
نفس الكلام ده نقدر تقوله ع يوتيوب وفنفس الوقت ع تيكتوك، يوتيوب احنا عارفينه ومننا وعلينا وبنستخدمه من زمان لكن تيكتوك بسبب ظهوره في الفترة الآخيرة لاحظت ان الناس عندها فهم خاطئ للمنصة، طبعاً حقهم بسبب الطريقة الغريبة اللي تيكتوك انتشر بيها ف البداية، لكن تعالوا اوضحلكم كام حاجة.
دلوقتي انت كـ منصة محتوى مرئي عشان تخلي الشخص يقضي وقت اكبر عندك محتاج تعمل ايه؟ اكيد انك تعرضله حاجات هو حابب يشوفها، اياً كانت الحاجات دي ايه
تيكتوك عشان يعمل كده - وكذلك يوتيوب - قدامه حاجة من اتنين، اول طريقة هي انك تقوله يا تيكتوك انا بحب اتفرج ع فيديوهات كذا وكذا وكذا، انت بتقول لتيكتوك كده عن طريق تفاعلك مع الفيديوهات، سواء بمدة المشاهدة او بعمل لايك او بعمل فولو للشخص اللي ناشر الفيديو، كل ده بيفهم خوارزمية تيكتوك او اياً كانت المنصة ايه انك بتحب المحتوى ده هاتلي منه اكتر
وده اللي احنا متعودين عليه بالفعل في يوتيوب وهو اننا عاملين اكونت وبنشترك فيه في القنوات اللي بنحب نشوف المحتوى بتاعها
طيب الطريقة التانية ايه بقى؟
لو انت مش عامل اكونت ومش قايل لتيكتوك انا بحب فيديوهات كذا وكذا، وقتها هيضطر يتصرف من دماغه عشان يجيبلك حاجات هو متوقع انك هتحب تتفرج عليها او تقضي وقت اكتر عليها، تيكتوك بيعمل كده عن طريق انه بيعرف مكانك الجغرافي ايه، يقوم قايل ايه ده هو في مصر؟ طب شوفلي ايه الحاجات اللي الناس اللي من نفس المنطقة الجغرافية دي بتتفرج عليها وبتحبها يمكن تعجبه هو كمان ويقضي وقت اكتر ع المنصة ونستفيد منه
هنا بقى المعضلة الكبيرة، المحتوى المنتشر على تيكتوك في مصر واللي اغلب الناس بتتفرج عليه ع المنصة دي هو المحتوى السئ اللي كلنا عارفين تيكتوك بيه، فيديوهات الـ "رقص" القصيرة دي
عشان كده لو انت في مصر وفتحت تيكتوك وانت مش مسجل فيه او مسجل اكونت لسه جديد هتلاقي نوعية الفيديوهات دي بيجيلك منها كتير جداً جداً، وقتها انت نفسك هتكره المنصة وتقفلها ومش هتفكر انك تدور فيها ع محتوى حلو
نفس الكلام بالظبط نقدر نطبقه ع يوتيوب..مش مصدق؟ جرب افتح يوتيوب ع جهازك الأساسي وافتح جمبه يوتيوب ع جهاز مش متسجل عليه اكونت جوجل اصلاً، واتفرج ع فرق المحتوى اللي جايلك ع الاتنين، اللي هتشوفه ع يوتيوب اللي مش مسجل عليه اكونت هو المحتوى الأكثر مشاهدة في المنطقة الجغرافية اللي انت فيها، عشان كده جالك، لكن يوتيوب اللي انت مسجل عليه اكونتك، هيجيلك عليه المحتوى اللي انت مشترك فيه او محتوى شبهه بدرجة معينة
ده يخلينا نوصل لإستنتاج مهم وهو كالآتي:
تيكتوك كـ منصة محتوى مرئي ممتازة جداً، وعليه نوعية محتوى مش موجودة ع يوتيوب او ف اي مكان تاني وهنا انا بتكلم ع محتوى مفيد وممتع سواء كان تقني او علمي او اي حاجة انت ممكن تكون مهتم بيها
عشان توصل للمحتوى ده ف انت بديهي محتاج تتابع الناس اللي بتنزله، وتتفرج ع فيديوهاتهم وتعملها لايك.. محتاج تفهم الخوارزمية ان انت بتحب فيديوهات كذا، ومش عاوز تشوف فيديوهات الرقص والحاجات اللي شبهها زي ما فهمت يوتيوب ع مدار فترة استخدامك ليه
لو انت معندكش استعداد تعمل ده عادي جداً ممكن ماتستخدمهوش وماتقربش منه، انما ماتحرمش حد من فرصة انه يكتشف محتوى ممتع وممكن يحبه عن طريق انك تقوله "تيكتوك عليه فيديوهات رقص بس"
اتفقنا؟
BY: Low quality tech content
